Янгиланган мобил илова

 2024 йил 1 августда «Soliq» мобил иловасининг тўлиқ янгиланган мутлақо янги интерфейсга эга 2.0.0 версияси фойдаланувчиларга тақдим этилди.

Ушбу версияда иккита янги хизмат «Солиқ бизнес» ва «Барқарорлик рейтинги» хизматлари жорий қилинди.

«Солиқ бизнес» – Юридик шахслар ва якка тартибдаги тадбиркорлар учун мобил шахсий кабинет, ушбу хизмат орқали фойдаланувчилар молиявий операциялар ва бошқа бизнес аспектлари ҳақида маълумот олишлари мумкин.

Хизматдан фойдаланиш учун корхона раҳбари ва бош ҳисобчиси Фаcэ ИД орқали рўйхатдан ўтади.

- Биринчи саҳифада қуйидагилар кўринади:
- корхона номи;
- СТИР;
- барқарорлик рейтингидаги ўрни;
- солиқ мажбуриятлари ҳолати (бажарилган ёки бажарилмаган).

Кейинги бўлим – корхонанинг иқтисодий фаолиятига тегишли асосий муаммолар, саволлар ва маълумотларни ўз ичига олади. Улар «ДСБ маъмурчилиги» ва «Маҳаллабай» ишлаш тизимидаги мезонлар асосида акс эттирилади. Масалан: солиқ ҳисоботлари, ҳисобланган солиқлар ва йиғимлар, банк ҳисоб рақамлари, ЭҲФ, электрон ишончнома ва шартномалар ҳолати. Бунда ҳисоб рақам тўхтатилиш сабаби ҳам кўрсатилади. Мисол учун, солиқ ҳисоботларини ўз вақтида тақдим этмаслик, камерал натижалари бўйича талабномага жавоб бермаслик, солиқ тўловчи ўзи кўрсатган манзилда бўлмаслиги...

Шахсий кабинетга юборилган талабнома ва бошқа ёзишмалар алоҳида кичик бўлимда жамланган. Бу ердан солиқ органига мурожаат юбориш имконияти ҳам яратилди.

Бизнес жараёнларини ва бухгалтерлар фаолиятини корхона раҳбари билан бир пайтда таъсисчилар, бизнес ҳамкорлар ва бошқа ишончли шахслар ҳам кузатиб бориши мумкин. Бунинг учун корхона раҳбари кузатувчи режимини фаоллаштириши кифоя.

Солиқ тўловчилар ўзига бириктирилган солиқ инспектори билан тўғридан-тўғри алоқа ўрнатиб, уларнинг фаолиятига салбий ёки ижобий баҳо бериш мумкин.

       «Барқарорлик рейтинги» – ушбу хизмат орқали фойдаланувчилар ўзларига тегишли ёки шартномавий муносабатларга киришмоқчи бўлган юридик корхоналарининг барқарорлик рейтинг кўрсаткичлари тўғрисида маълумот олишлари мумкин.

Мобил иловани кейинги 2.0.1, 2.0.2, 2.0.3 версияларида илованинг барқарор ва қулай ишлаши учун юзага келган хатоликлар бартараф этилиб, фойдаланувчилар эътиборига ҳавола этилди.

2024 йил 17 октябрда илованинг янги 2.0.4 версияси ишлаб чиқилди. Ушбу версияда ҳам илова фойдаланувчилари учун бир нечта фойдали функциялар ва яхшиланишлар жорий қилинди, Жумладан:

-         “Пуш-хабарномалар ва янгиликлар” функцияси қўшилди. Эндиликда фойдаланувчилар барча муҳим воқеаларни ва янгиликларни ўтказиб юбормайдилар, ушбу функция орқали барча фойдаланувчилар ўзгаришлардан хабардор бўлишлари мумкин.

-                   “Резидентлик сертификати”, “Комиссионер шакллантириш” ва “Солиқ тўловчи маълумотлари” хизматлари янги дизайнга эга бўлди.

«Soliq» мобил иловасининг янги 2.0.5 версияси 2024 йил 15 ноябрь санасида фойдаланувчилар учун тақдим этилди. Ушбу версияда янги «Менинг уйим» хизмати ишга туширилди. Шунингдек, «Хабар юбориш», «Солиқ имтиёзларини қайтариш» ва «Ижарага бериш» хизматлари дизайни янги кўринишга эга бўлди.

«Soliq» мобил иловасининг «Менинг уйим» хизмати орқали фойдаланувчилар барча коммунал ва бошқа хизматларни кузатиб бориш ва тўлаш, шунингдек, “Автотўлов” ва «Хабарнома» хизматларини ўрнатишлари мумкин.

Бунинг учун янги фойдаланувчилар Face ID авторизациясидан ўтишлари керак.

Агар фуқароларнинг эгалигида кўчмас мулки бўлса, барча объектлар автоматик равишда акс эттирилади.

Бошқа квартира ёки уйни мустақил равишда қўшишлари мумкин.

«Менинг уйим» хизмати орқали:

- электр энергияси;

- табиий газ;

- совуқ сув;

- иссиқ сув;

- маиший чиқиндиларни олиб кетиш;

- интернет;

- шаҳар телефони алоқаси учун тўловларни амалга ошириш мумкин.

Бунинг учун бир марта қуйидаги маълумотларни киритиш керак:

- шахсий ҳисоб рақам,

- компания провайдери;

- шаҳар телефон рақами;

- банк картаси (агар олдин қўшилмаган бўлса).

Шунингдек, қарздорлик ҳолати кузатилганда «Менинг уйим» бўлимининг асосий ойна қисмида «Қарз» ёзуви орқали хабардор бўлиш имконияти мавжуд.

Тўлов ҳақидаги маълумотлар «Тўловлар мониторинг» ойнасида сақланади

«Soliq» мобил иловасининг янги 2.0.7 версияси илова фойдаланувчилари учун тақдим этилди.

«Soliq» мобил иловасининг янгиланган версиясида бизнес жараёнларини оптималлаштириш учун «Солиқ бизнес» бўлимида директорлар (бухгалтерлар)га 2 та янги хизмат яратилди.

- Умумий овқатланиш корхоналари учун жисмоний шахслардан қишлоқ хўжалиги маҳсулотларини нақд пулга харид қилиш далолатномасини онлайн расмийлаштириш;

- Туроператор ва меҳмонхона хизматлари кўрсатувчи корхоналар учун ҚҚСни қайтариш бўйича ариза юбориш имкониятлари тақдим этилди.

Яна бир янгилик – «Ижарага бериш» хизматини «Кўчмас мулк ижарасини расмийлаштириш» бўлимида бирга яшовчиларни қўшиш имкони яратилди.

2024 йилда буён «Soliq» мобил иловаси фойдаланувчилари сони 3 565 146 тага ошиб ҳозирда мобил илованинг умумий фойдаланувчилари сони 9 231 516 нафарни ташкил қилмоқда. 

Илова орқали солиқ хизматига савол беришингиз ёки «Davr-On» виртуал ёрдамчисига мурожаат қилишингиз мумкин.