2024 йилда солиқ хизмати органларини коррупциядан ҳоли тизимга айлантириш юзасидан олиб борилган ишлар

1. Коррупцияга қарши курашиш кўрилган чоралар

2024 йилда:

- салбий ҳолатларни содир қилмаслик юзасидан 5 932 нафар ходим билан алоҳида профилактик тарбиявий суҳбатлар ўтказилди;

- турли солиқ текширувларини ўтказишга сафарбар қилинган ходимлар билан 37,1 минг суҳбатлар ўтказилиб, тилхатлар олинди;

- жами 2,5 мингга яқин  хизмат текшируви ва хизмат ўрганишлари ўтказилиб, айбдор ходимларга нисбатан тегишли чоралар кўрилди.

Ўтказилган хизмат текшируви ва ўрганишлари якуни билан давлат бюджетига 344,6 млрд.сўм солиқ ва тўловлар қўшимча ҳисобланиб, шундан 120,1 млрд.сўм давлат бюджетига ундирилди.

Шунингдек, солиқ ходимлари томонидан 2 326 та ҳолатда аҳолидан 7 809,4 млн.сўм солиқларни ундиришда хатоликларга йўл қўйилганлиги аниқланди ва тўпланган материаллар хуқуқий баҳо бериш учун хуқуқ тартибот идораларига юборилди.

2. Ҳуқуқий тарғибот-ташвиқот тадбирлари

Солиқ хизмати органинг коррупцияга қарши курашиш тузилмалари томонидан 2024 йил давомида коррупцияга нисбатан муросасиз муносабатни шакллантириш борасида бир қатор тарғибот ишлари олиб борилди.

Хусусан, жойларда 2 440 дан ортиқ учрашув ва семинарлар ўтказилди. Шундан 941 таси ҳуқуқни муҳофаза қилувчи органлар ҳамкорлигида бўлиб ўтди. Қолаверса, 2003 дан ортиқ ОАВларида (87 та радио, 124 та телекўрсатув, 61 та нашр ва мақолалар, 1 722 та ижтимоий тармоқда) чиқишлар амалга оширилди.

Бевосита Солиқ қўмитасида ўтказилган тадбирлар қўмитанинг расмий веб сайтида эълон қилиб борилди.

Жазони ўташ муассасаларида сақланаётган собиқ солиқ ходимлари (маҳбуслар)дан махсус интервьюлар олиниб, Zo‘r TV телеканали мутахассислари билан ҳамкорликда “Ишонч ва Нафс чегараси” номли махсус видео фильм тайёрланди.

Ушбу видео фильм солиқ хизмати органида фаолият юритаётган барча ходимларга намойиш этилиб, тегишли огоҳлантирув-профилактик тадбирлар ўтказилди.

3. Инсон омилини чеклаш ва рақамли технологиялардан фойдаланиш

Солиқ тўловчиларга қулайлик яратиш, солиққа оид ҳисоб-китоб жараёнларини соддалаштириш ва иқтисодиётда хуфиёна айланмаларни ўз вақтида аниқлаш ва олдини олишни таъминлаш мақсадида 2024 йилда 5 та янги ахборот тизими («Барқарорлик рейтинги», «Солиқ органларида коррупция хавфларини бошқариш» «Солиқ органларига мурожаатлар», «Жисмоний шахслар маъмурчилиги», «Барча тузилмалар ходимлари фаолиятини баҳолаш») ишлаб чиқилиб, амалиётга жорий этилди.

Бугунги кунда электрон солиқ хизматлари порталида солиқ тўловчиларга 60 дан ортиқ турдаги электрон хизматлар кўрсатилмоқда.

Жумладан, 2024 йил давомида интерактив солиқ хизматлари порталида «Ёлланма ходимларнинг солиқларини тўлаш», «Филиаллар рўйхатини ва матрицали штрих-код маълумотномаларини шакллантириш», «Жисмоний шахсларнинг электрон ҳужжатларини расмийлаштириш», «Ўзини банд қилганларнинг солиқ имтиёзларидан фойдаланиш тўғрисида мурожаат», ЮШларга ўрни қопланиши лозим бўлган ҚҚС суммасини қайтариш ва бошқа хизматлар янги хизматлар ишга туширилди.

2024 йилда “Soliq” мобил илованинг янги версияси ишлаб чиқилган бўлиб, бугунги кунда ушбу илова орқали рўйхатдан ўтганлар 9,1 млн. нафарни, шундан фаол фойдаланувчилар 4,7 млн. нафарни ташкил этмоқда. Ушбу илова Play Market ва App Store платформалари Молия йўналишидаги жами 198 та мобил иловалар рейтингида бугунги кунда 3-ўринни эгаллаб турибди.

Иловада 2024 йилда 7 та янги хизмат (“Солиқ бизнес”, “Товар-транспорт юк хати”,  “Хабар юбориш”,  “Фискал модулга тўлов”,  “Комиссионер шакллантириш”, “Барқарорлик рейтинги”, “Менинг уйим”) ишга туширилиб мобил илова орқали кўрсатиладиган хизматлар сони 33 тага етказилди. Шунингдек “Менинг профилим” панели яратилиб, фойдаланувчинг шахсий маълумотлари ушбу панелга бирлаштирилди.

4. Алоқа каналлари воситасидан фойдаланиш

Солиқ қўмитаси тизимида ходимлар хатти-ҳаракатларининг қонунийлигига, одоб-ахлоқ нормаларига риоя қилишга, шунингдек, коррупция ва бошқа ҳуқуқбузарлик ҳолатлари содир этилишини олдини олишга қаратилган алоқа каналлари узлуксиз фаолият юритмоқда.

Солиқ органининг расмий веб-сайтидаги «Ишон телефонлари», Шахсий хавфсизлик тузилмаларининг телефон рақамлари, телеграм ижтимоий тармоғидаги “@dsq_anticorrupciya_bot” боти, «Электрон солиқ хизматлари» портали ва бошқа каналлари тўғрисидаги маълумотлар тўлиқ янгиланди.

Солиқ хизмат органи ходимларининг ноқонуний хатти-ҳаракатлари юзасидан 2024 йил давомида келиб тушган  393та мурожаат (114 таси ёзма, 120 таси электрон, 159 таси оғзаки), шунингдек, дсқ_антиcоррупcия_бот канали орқали келиб тушган 380 дан ортиқ хабарлар кўриб чиқилган.

Келиб тушган мурожаатларнинг тасдиқланганлари бўйича ходимларга тегишли чоралар кўрилди.

5. Хавф-хатарларни баҳолаш.

Ўзбекистон Республикаси Вазирлар Маҳкамасининг 2019 йил 17 апрелдаги 320-сон қарори билан «Ўзбекистон Республикаси Давлат солиқ қўмитаси тўғрисида Низом» тасдиқланган бўлиб, Низомнинг 10-бандига мувофиқ, давлат солиқ хизмати органларига юклатилган вазифалардан келиб чиққан ҳолда функциялар белгилаб берилган.

Қўмитанинг Шахсий хавфсизлик бошқармаси томонидан 2024 йил май ойида вазифалардан келиб чиққан ҳолда 97 та функция бўйича коррупцион хавф-хатар баҳоланган.

Амалга оширилган ишлар натижаси https://e-anticor.uz веб сайтидаги «Коррупциявий хавф-хатарларни аниқлаш ва баҳолаш модули»ги киритилган.

Ушбу функциялардан 20 таси бўйича хавф-хатарлар юқори ва ўрта даражани ташкил этганлиги сабабли, уларни бартараф этиш бўйича 23 банддан иборат Дастур ишлаб чиқилди ҳамда ижрога қаратилди.

6. Манфаатлар тўқнашувини тартибга солиш

Солиқ хизмати органларининг барча тузилмаларида манфаатлар тўқнашуви бўйича 2024 йил давомида раҳбар ва ходимлардан 9 150 та декларациялар қабул қилинди.

Манфаатлар тўқнашувини аниқлаш тизими солиқ хизмати органларида тўлиқ автоматлаштирилди. Шунингдек, 2024 йил давомида харидлар йўналишида манфаатлар тўқнашуви аниқланмади.

2025 йил 1 январь ҳолатига солиқ хизмати органларидаги ходимлар ўртасида манфаатлар тўқнашуви мавжуд эмас.

7. Эришилган натижалар

Ўзбекистон Республикаси Президентининг 2022 йил 12 январдаги ПҚ-81-сон қарорига мувофиқ, Коррупцияга қарши курашиш агентлиги томонидан 95 та давлат органи ва ташкилотларида 2023 йилда коррупцияга қарши курашиш борасида олиб борилган ишлар самарадорлиги рейтинг баҳолашдан ўтказилди.

Баҳолаш натижаларига кўра, 42 та давлат органи ва ташкилотлар самарадорлик кўрсаткичлари, шу жумладан, Солиқ қўмитасининг натижалари ҳам «яхши» деб баҳоланди. Агентлик ва экспертларнинг хулосасига асосан Солиқ қўмитасига 82 балл билан берилди.

Солиқ органи ўзининг коррупцияга қарши сиёсатида белгилаб олган асосий тамойилларидан келиб чиқиб, коррупцияга қарши курашиш тизимини доимий равишда такомиллаштириб боради ҳамда коррупциядан ҳоли давлат органи сифатида тан олиниши учун барча чораларни кўради.

Солиқ қўмитаси Шахсий хавфсизлик бошқармаси

2024 йилда солиқ хизмати органларини коррупциядан ҳоли тизимга айлантириш юзасидан амалга оширилган ишлар

2024 йил I ярим йилликда солиқ хизмати органларини коррупциядан ҳоли тизимга айлантириш юзасидан амалга оширилган ишлар

2024 йил I чоракда солиқ хизмати органларини коррупциядан ҳоли тизимга айлантириш юзасидан амалга оширилган ишлар

2023 йилда солиқ хизмати органларини коррупциядан ҳоли тизимга айлантириш юзасидан олиб борилган ишлар